पारवा

कधी ओसाड जागीचा अनाहूत पारवा झालो

तुझ्या आभाळल्या नजरेतला मी गारवा झालो

तुझ्या श्वासातले संगीत आहे जोगीया माझा

तुझ्या ओशाळल्या मुद्रेतला मी मारवा झालो

तुला न्याहाळताना जिंदगीचा केवडा झाला

तुझ्या वेणीतल्या गजऱ्यातला मी मोगरा झालो

मनाचे फुल झाले अन तयांनी गलबला केला

खुळा मजनू म्हणाले अन म्हणे मी बावरा झालो

ऋतु उलटून जाताना मनी हुरहूर सूर झाली

जणू विरहातल्या गाण्यातही मी केरवा झालो

निरज पुरुषोत्तम चौधरी

१८/०९/२०२१

रात्री ३:०३ मिनिटांनी