घागर

घागर

भूईवर घागर,अथांग सागर
फार बोलकी,चार पोलकी
कमवा,जमवा,गमवा आता
आपुलकीने, हाणून लाथा
माणुसकीचा चावून चोथा...

असाच दिसतो एक आरसा
दरवळ ज्यावर नसे फारसा
नागासाकी.. हिरोशीमाचा
कातर व्हावा पुन्हा कवडसा
अंधाराची.. नवीन गाथा
धडे गिरवतो फोडून माथा...

भाळ, गाळ अन् लडिवाळ मन
डोळ्यांसरशी भरणे वंगण
कसे मिळावे अथांग जगणे
कसे घडावे सागर मंथन
काय मागतो अनाथ नाथा ?
दगडांवरती टेकून माथा...?

जात-पात अन् खुजेल बुटका
मूर्ती-भंजन उडतो खटका
शातीर सारी माणूसवारी
अपुले म्हणता मिळतो झटका
रोज वाचणे कुजली गाथा
अजून तरिही घडा पालथा...

असेल काही उरले-सुरले
कुठले पाणी कुठवर मुरले
कोण बायकी अमुच्या बाता
कुणास ओतून कुणास भरले
मशीद,मन्दिर,विहार फिरता
मर्माचा खिळ-खिळा पायथा...

नीरज पुरुषोत्तम चौधरी
20/07/2016
मो.न.7066122962